Zuma: Staak die sanksies teen Zim
2010-09-28 08:14
Media24-Afrika-kantoor
Pres. Jacob Zuma sal Europese leiers vandag in België rondborstig vra om sanksies teen Zimbabwe op te hef.
Hy was gister reeds in Brussel en sal vandag met mnre. José Manuel Barroso, president van die Europese Kommissie, en Herman van Rompuy, president van die Europese Raad, in die Belgiese hoofstad vergader.
Dit is die derde Europese Unie (EU)-Suid-Afrika-beraad.
“Die president sal Europese leiers baie reguit vra om die sanksies teen Zimbabwe op te hef,” het mnr. Zizi Kodwa, Zuma se woordvoerder, gister uit Brussel gesê.
Zuma is die Suider-Afrikaanse Ontwikkelingsgemeenskap (SAOG) se afgevaardigde wat moet verseker die globale politieke ooreenkoms (GPA) wat in 2008 gesluit is, word deur Zimbabwe se twee strydende partye toegepas.
Volgens Kodwa word die sukses van die Zimbabwiese eenheidsregering deur die sanksies gekelder juis omdat dit die beweging van sommige Zanu PF-kabinetslede, onder wie pres. Robert Mugabe, beperk.
Me. Lindiwe Zulu, Zuma se hoof-bemiddelaar in Zimbabwe, glo Europese leiers sal druk op Suid-Afrika plaas juis omdat hulle voel hervorming in Zimbabwe gebeur te stadig.
Sy is saam met Zuma in België.
Intussen het die VSA eergister in ’n verklaring bevestig dat sanksies teen Zimbabwe sal bly, want al herstel die land se ekonomie, kom politieke geweld en intimidasie steeds voor.
Mnr. Morgan Tsvangirai, Zimbabwe se premier, het verlede week vergaderings vir die skryf van ’n nuwe grondwet gestaak nadat geweld byna elke vergadering hieroor in Harare en oor Zimbabwe heen ontwrig het.
“Dit sal goed wees as Westerse lande die sanksies kan ophef ... want dan sal niemand dit kan gebruik om ander mee te mobiliseer nie,” het
Zulu gesê.
“Zanu PF gebruik dit somtyds, selfs die meeste van die tyd, om aan mense te sê: Sien ons kan nie tot dít of dát instem nie, want die sanksies is steeds daar.
“As sanksies opgehef word, sal enigiemand wat ander (in die onderhandelinge as gyselaar hou) nie ’n been hê om op te staan nie.”
Kodwa glo Zuma het ’n sterk saak om te vra dat sanksies opgehef word.
Zuma is egter nie haastig om Zimbabwe te druk om volgende jaar verkiesings te hou nie.
“Ons wil vrede en sekerheid in die streek verseker. Sulke omstandighede moet geskep word.
“Die verkiesing moet vry en regverdig wees,” het Kodwa gesê.
Zuma besoek België net enkele maande voor die EU se Afrika-beraad in November in Libië.
- Beeld