SA 'kan misluk' oor staat se onbevoegdheid
2011-11-12 10:00
Johannesburg – Die nasionale beplanningskommissie waarsku Suid-Afrika loop die gevaar om weens die staat se onbevoegdheid te misluk met die inwerkingstelling van sy ambisieuse ontwikkelingsplan.
Dít is van die talle tekortkominge wat dié kommissie, aan wie die taak verlede jaar toevertrou is om ’n nasionale ontwikkelingsplan en -visie saam te stel, in ’n omvattende dokument uitlig.
Die plan is Vrydag by die presidensiële gastehuis in Pretoria aan pres. Jacob Zuma oorhandig.
Die kommissie onder leiding van Trevor Manuel, die beplanningsminister, bestaan uit 26 lede onder wie Joel Netshitenzhe, voormalige beleidshoof in die presidensie, mnr. Bobby Godsell, voormalige voorsitter van Eskom, en prof. Ihron Rensburg, rektor van die Universiteit van Johannesburg (UJ).
Daar is luidens ’n diagnostiese verslag van die kommissie 9 brandpunte waarop die regering moet fokus.
Werkloosheid, die swak gehalte van onderwys vir die meeste swart leerlinge, ruimtelike beplanning wat armes daarvan weerhou om te ontwikkel, die gesondheidstelsel wat in duie stort en korrupsie is van die vernaamste struikelblokke.
Die kommissie meen hoewel al 9 kwessies belangrik is, is werkloosheid en ’n beter onderwysstelsel van uiterste belang.
Altesaam 11 miljoen nuwe poste kan ingevolge die plan teen 2030 geskep word en die kommissie stel ’n vyfpunt-plan voor om dié doelwit te haal.
Dit is luidens die plan nodig dat “’n nuwe storie vir Suid-Afrika geskryf word. Die regering het sedert 1994 goed gevaar met die goed wat makliker is om uit te voer soos die betaling van toelae en die voorsiening van water en elektrisiteit. Daar is egter gefaal met moeiliker goed soos om onderwys te verbeter en werk te skep,” lui die dokument.
Die kommissie sê die gesondheidstelsel moet reggeruk word en stel die doelwit dat alle Suid-Afrikaners teen 2030 gehalte-gesondheidsorg – gratis by dienspunte – moet hê.
Baie meer sal ook gedoen moet word om korrupsie aan te pak, word gewaarsku.
“Daar is steeds gapings in die teenkorrupsie-arsenaal. Instansies soos die openbare beskermer (OB) en die spesiale ondersoekeenheid (SOE) word onderfinansier, het nie genoeg personeel nie en word onderwerp aan inmenging van buite.”
Die kommissie sê Suid-Afrika het die potensiaal en kapasiteit om armoede oor die volgende twee dekades uit te wis.
Zuma sal die plan oorweeg, waarna dit aanstaande jaar vir goedkeuring aan die kabinet voorgelê sal word.
Die staat se onbevoegdheid kan daartoe lei dat sy ontwikkelingsplan misluk.Brandpunte waarop die regering moet fokus, is werkloosheid, die swak gehalte van onderwys vir die meeste swart leerlinge, ruimtelike beplanning, die gesondheidstelsel wat in duie stort en korrupsie.Die kommissie sê Suid-Afrika het die potensiaal en kapasiteit om armoede oor die volgende twee dekades uit te wis.
– Volg Nuus24 op Twitter
- Beeld