SA-joernalis in Nigerië ontvoer
2010-03-01 22:15
Johannesburg – ‘n Suid-Afrikaanse joernalis wat vir M-Net Supersport werk is Maandagmiddag in Nigerië ontvoer, het SABC-nuus Maandag berig.
Hy was na bewering op ‘n bus saam met ‘n span van Supersport wat na Lagos onderweg was.
Die joernalis en twee Nigeriërs is glo ontvoer.
“Op hierdie stadium is ons departement besig om onderhoude met die familie te hê.
“Nigerië het begin met ‘n proses om met Nigeriese amptenare te onderhandel sodat ons by ‘n oplossing kan kom om ons burger terug te kry. Ons hoop ook om kontak te maak met diegene wat beweer dat hulle hom ontvoer het,” het Malusi Mogale, woordvoerder van die departement van internasionale betrekkinge, gesê.
“Ons het geen besonderhede nie en ‘n senior werknemer van Supersport gaan binnekort na Lagos vertrek om die feite vas te stel. Ons sal ‘n verklaring uitreik so gou ons weet wat presies gebeur het, seker teen Dinsdag,” het Gary Taiman, Supersport se inhoudshoof, gesê.
- Sapa