SA is nié in resessie, meen ekonoom

2012-06-14 14:00

Johannesburg – Ontleders sê Suid-Afrika se ekonomie is gevaarlik naby aan negatiewe terrein indien die huidige tendense voortduur, het die jongste BankservAfrica Beti-indeks getoon.

Mike Schüssler, hoof-ekonoom van Economists.co.za, sê die goeie nuus is dat Suid-Afrika beslis nie in 'n resessie is nie, ten spyte van die Beti-indeks wat 'n geruime tyd al op 'n verlangsaming in die ekonomie dui, het RSG berig.

Schüssler sê egter die Beti-indeks vir Junie is die swakste op 'n jaargrondslag sedert April verlede jaar. Die kwartaallikse persentasie-verandering is op die laagste vlak sedert Desember verlede jaar.

Die ekonoom sê indien dié afwaartse neiging bevestig word, sal dit die eerste keer sedert die resessie van 2008/2009 wees wat groei negatief is.

Hy sê die jongste daling in die indeks is weens hoë stygings in die petrolprys en laer groei in die ontwikkelde wêreld, te same met stadiger groei in China en Indië, het die radiostasie berig.

Volg Nuus24 op Twitter