SA ingenieur vasgekeer ná aardbewing
2010-03-01 06:26
Eugene Gunning
George - ’n Suid-Afrikaanse lugvaartingenieur is in Santiago, Chili, vasgekeer sedert ’n verwoestende aardbewing en naskokke die gebied dié naweek getref het.
Gerhard Jordaan (49), wat deesdae in Traralgon, Australië, woon, was gisteraand in ’n wedloop teen tyd gewikkel om uit Chili pad te gee. Hy en sy vrou, Annelie, was veronderstel om Saterdagaand op ’n besoek na Suid-Afrika te vertrek.
Hy sou probeer om met ’n bus oor die Andes-gebergtes na Mendoza in Argentinië te reis. Daarvandaan wou hy per ligte vliegtuig na Beunos Aires vlieg en daar ’n vliegtuig na Australië haal.
Jordaan se penarie speel af teen die agtergrond van die ramp waarin meer as 700 mense reeds dood is nadat ’n aardbewing van 8,8 op die Richterskaal Chili geskud het.
Chili se aangewese president, Sebastián Piñera, het gewaarsku dat die dodetal kan styg.
Hy het gesê dis die ergste skudding in Chili die afgelope 30 jaar.
Ná die aardbewing het verskeie lande voorsorgmaatreëls getref. In Japan is noodpersoneel op ’n gereedheidsgrondslag geplaas uit vrees vir reuse-seegetygolwe, ook bekend as tsoenami’s.
Jordaan het gistermiddagper selfoon uit Santiago aan Die Burger gesê die lughawe in die stad is onbepaald gesluit.
Hy het Chili besoek om een van die vliegtuie van sy Australiese werkgewer te laat sertifiseer.
Jordaan en sy gesin het sowat twee jaar gelede na Australië verhuis nadat hulle vroeër onder meer in Bredasdorp gewoon het.
Volgens Jordaan het hy Saterdagoggend omstreeks 03:30 wakker geword weens die aardbeweging. Hy het gesê dit was angswekkend om so wakker te word, met die hele hotel wat heen en weer skud, en ’n verskriklike gedreun, geknal en gekraak.
Hy kon nie die kamerdeur oopkry nie omdat die gebou van al die geskud vervorm het.
Ná die hoofskudding het hy op sy bed gaan lê en wag vir die naskokke.
“Die naskokke was amper erger – sodra jy dink dis nou verby, dan kom hulle weer. Eers is dit net so ’n ligte geratel wat stelselmatig opbou totdat die hele gebou skud en klap.”
Hy het gesê die Chilene is goed voorberei vir sulke noodsituasies. “Daar heers kalmte en alles is onder beheer.” Die winkels is gesluit en die strate van Santiago is stil.
In Mosselbaai het Jordaan se skoonma, Barbara van der Westhuizen, duim vasgehou dat haar skoonseun wel betyds in Australië sal kom.
- Die Burger