SA in duister oor ANC se nuwe adjunk

2012-12-03 10:19

Johannesburg – Die meeste provinsies het pres. Jacob Zuma as leier van die ANC benoem, maar Suid-Afrikaners is nog in die duister oor wie sy adjunk gaan wees.

KwaZulu-Natal, die Oos-Kaap, Mpumalanga, die Vrystaat en die Noord-Kaap het hul steun aan die president toegesê voor die party se nasionale verkiesingskongres, wat op 16 Desember in Mangaung plaasvind.

Gauteng en die ANC se jeugliga wil egter hê die huidige adjunk-president, Kgalema Motlanthe, moet die leisels by Zuma oorneem. Dis nog nie bekend of hy die benoeming sal aanvaar nie.

Eyewitness News berig dit blyk dat Cyril Ramaphosa, lid van die ANC se uitvoerende komitee, die gunsteling-kandidaat vir adjunk-president van die party is.

Intussen het adj.pres. Motlanthe volgens Sapa gesê hy stel nie daarin belang om 'n organisasie te lei waarin sy verkiesing "vasgestel" is nie.

"Ek wil nie 'n organisasie lei waar ek geen sin het van wat die lede van my dink nie, en waar my verkiesing vooraf vasgestel is nie. Ek sal dit nooit doen nie," het hy aan Business Day gesê.

Lees meer hier

Volg Nuus24 op Twitter