SA het te min petrol
2012-02-01 07:03
Johannesburg – Vulstasies in dele van die land loop droog weens ’n landwye tekort aan brandstof en ’n toeloop Dinsdag voordat die prys van petrol middernag gestyg het.
Die tekort aan petrol kan tot die middel van volgende maand duur nadat probleme by raffinaderye en die Durbanse hawe ondervind is.
Peter Noke, nasionale direkteur van die Suid-Afrikaanse Petroleum-kleinhandelaarsvereniging (Sapra), het gesê die petroleumbedryf is onder konstante druk wat nie gou opgelos gaan word nie.
“Die bedryf is reeds vanaf November verlede jaar onder druk nadat beplande en onbeplande instandhouding nodig was by die Sapref- (Shell en BP) en Enref-raffinadery (Engen).”
Dit is vererger weens probleme met die pompstasie buite die hawe. Die stelsel maak gebruik van ’n boei wat deur olietenkskepe gebruik word om ru-olie na die raffinaderye by Durban se hawe te pomp. Sowat 80% van alle ru-olie wat vir Suid-Afrika bestem is, word deur Durban se hawe gepomp.
Noke het verduidelik dat spesialisduikers nodig was om die pompstelsel te herstel.
“Die duikers mag net 16 minute onder water sweis en dan eers weer ná 32 uur. Ons moes ook spesialiste van die buiteland inbring omdat daar nie genoeg duikers met die nodige vaardighede in die land is nie.”
Terwyl die tenkskepe buite Durban se hawe gewag het vir die herstel van die pompstelsel, kon Sapref en Enref nie olie raffineer nie.
“Wanneer ’n raffinadery ‘afskakel’ kan dit nie net oornag weer ‘aangeskakel’ word nie. Dit neem minstens twee weke om weer op dreef te kom.”
Hy het gesê daar was dringende samesprekings tussen die regering, raffinaderye en ander betrokkenes om te probeer om die huidige tekort te voorkom.
“Daar is meer as een probleem. Die feit bly staan infrastruktuur skiet tekort.
“Dit is oud en daar is nie genoeg bergingsplek nie.”
– Volg Nuus24 op Twitter.
- Volksblad