SA het meeste tronkvoëls in Afrika
2012-11-19 16:35
Johannesburg – Sbu Ndebele, minister van korrektiewe dienste, het Maandag aan afgevaardigdes gesê Suid-Afrika het die meeste gevangenes in Afrika en die negende grootste aantal ter wêreld.
Ndebele het op 'n nasionale konferensie in Boksburg gepraat oor die oorbevolking van tronke.
Suid-Afrika het 310 gevangenes vir elke 100 000 mense.
In kontras het Nigerië, met 'n bevolking van 166,3 miljoen, slegs 31 gevangenes vir elke 100 000 mense.
Ndebele het gesê sowat 30% van gevangenes is verhoorafwagtend.
Die aantal gevangenes wat lewenslange vonnisse uitdien het sedert 1995 met byna 2400% gestyg, het die Nasionale Raad vir Korrektiewe Dienste Maandag gesê.
Regter Siraj Desai, voorsitter van die raad, het gesê 433 gevangenes het in 1995 lewenslange vonnisse uitgedien. Dié getal staan nou op 10 314 – 'n bietjie meer as 10% van gevangenes.
Desai het gesê dit skep probleme met betrekking tot wat met die gevangenes gedoen gaan word en dra by tot die probleem van die oorbevolking van gevangenisse.
"Wat doen jy met 'n gevangene met 'n lewenslange vonnis wat die korrektiewe stelsel betree?" het Desai gevra.
Desai het gesê toe die land die doodstraf opgeskort het, het die regering nie gedink wat hy sal doen met gevangenes wat lewenslange tronkstraf uitdien nie.
Ingevolge huidige wetgewing kan dié gevangenes binne 14 jaar in aanmerking kom vir parool indien hulle owerhede kan oortuig dat hulle nie weer oortredings sal begaan nie.
– Volg Nuus24 op Twitter
- SAPA
