SA grond 'nie soos in Zimbabwe gegryp'
2010-04-30 07:26
Sapa
Johannesburg - Daar sal in Suid-Afrika geen oornamee van grond volgens die Zimbabwiese manier wees nie.
Só het pres. Jacob Zuma hier by ’n grondwetlike simposium gesê.
“Daar sal geen soortgelyke oornames in dié land wees nie, want ons doen dinge binne die wet,” het Zuma gesê.
Hy het nie spesifiek na Zimbabwe verwys nie, maar burgerregte-groepe en opposisiepartye het vrees uitgespreek dat Suid-Afrika dieselfde pad as dié land in terme van grondhervorming kan loop.
Zuma het egter gesê die manier waarop grondhervorming nou plaasvind, sal hersien moet word.
“Beduidende veranderings sal aan die model van ‘gewillige koper, gewillige verkoper’ aangebring moet word.
“Die regering ondersoek goedkoper maniere van grondhervorming.” Daar word na ’n meer “pragmatiese” formule gekyk.
“Die algemene siening, die model van ‘gewillige koper, gewillige verkoper’, het tot dusver nie goed gewerk nie. Dit is egter baie belangrik dat ons dinge volgens die wet doen.”
Zuma hetin sy toespraak talle onderwerpe – onder meer transformasie, die onafhanklikheid van die regbank, beskerming van die Grondwet en respek vir kulturele diversiteit – aangeraak.
Hy het gesê hy wil ’n gesprek begin om Suid-Afrikaners uit te daag om “in gesprek te tree oor onsself – oor wie ons is”.
“Ons het nog nooit as ’n nasie probeer om dié diversiteit te ontleed nie.”
Hy het gesê hoewel die Grondwet sê ons moet mekaar se diversiteit respekteer, gee “sommiges hulself die reg om ander te veroordeel”.
Hy het gesê dit is belangrik vir die “siel van die nasie” om oor diversiteit te praat. “Ons is verenig in ons verskeidenheid – ons moet kom by ’n plek waar ons almal kan saamstem. Kom ons respekteer mekaar se kultuur.”
Volgens Zuma sal dié dialoog nie polities of regeringsgedrewe wees nie. “Dit sal vir alle Suid-Afrikaners die kans gee om te sê wie ons is, wat ons is en hoe ons ons as nasie moet handhaaf.”
Die simposium, wat deur die Black Management Forum georganiseer is, het onder meer gekyk na die onbedoelde implikasies en gevolge van sekere afdelings van die Grondwet.
- Die Burger