'SA gaan nóg kouer word' – Weerdiens
2012-07-14 07:30
Kaapstad – Die Stad Kaapstad moes reeds 560 mense te hulp snel wat weens swaar reën in die Kaapse Skiereiland dakloos gelaat is, het RSG Saterdag berig.
Die Sir Lowryspas- nedersetting, Red Hill en Masiphulmele word die ergste geraak.
Die woordvoerder van rampbestuur, Wilfred Solomons-Johannes sê die huise van 400 mense is in die River Park-, Rasta Camp- en Uitkyk plakkerskampe oorstroom.
Hulle het die nag in die Sir Lowryspas-gemeenskapsaal deurgebring.
Die Suid-Afrikaanse Weerdiens het voorspel dat die situasie in die Wes- Noord- en Oos-Kaap, sowel as die Vrystaat en KwaZulu-Natal kan vererger, terwyl Gautengers teen Saterdagmiddag kouer en winderige weerstoestande kan verwag.
Die SABC se verkeerskorrespondent, Rob Byrne, het laat Vrydagaand berig dat verskeie hoofpaaie in die Suid- en Oos-Kaap weens sneeu en ys gesluit is.
Dit sluit in die N6 tussen Aliwal-Noord en Queenstown, die N9 – tussen Middelburg en Graaff Reinet en die R61 tussen Graaff Reinet en Cradock.
Die meeste bergpasse in die omgewing is ook gesluit.
Volg Nuus24 op Twitter.
