SA elektrisiteit nie meer goedkoopste
2011-07-29 10:07
Johannesburg – Kanada het Suid-Afrika vervang as die verskaffer van die wêreld se goedkoopste elektrisiteit, het ‘n opname deur die internasionale energie-konsultante NUS Consulting gewys.
Business Day het Vrydag berig dit is te danke aan die onlangse hoë tariefverhoging wat die nasionale energiereguleerder (Nersa) aan Eskom toegeken het.
Nersa het verlede jaar die gemiddelde jaarlikse tariefverhoging van 25% vir drie jaar goedgekeur.
NUS sê Suid-Afrika se verskuiwing in die ranglys as die verskaffer van die goedkoopste elektrisiteit beteken dat die land die mededingende voordeel wat ons voorheen gehad het, kan verloor.
Michelle Lamprecht, waarnemende hoofbestuurder van NUS Consulting in Suid-Afrika, sê Suid-Afrika sal nie gou weer die land met die goedkoopste elektrisiteit wees nie aangesien die tariewe onlangs baie verhoog is.
NUS sê Kanada is die land met die goedkoopste elektrisiteit ná ‘n beskeie verhoging van 3,1% in een jaar.
Volgens die organisasie het Suid-Afrika, in teenstelling, oor dieselfde tydperk ‘n “yslike verhoging” van 27,8% ingestel.
“Suid-Afrika se elektrisiteit is nou 7% duurder as Kanadese energie nadat hulle baie jare die goedkoopste was,” het NUS gesê.
Volg Nuus24 op Twitter.
- SAPA