SA ekonomie gaan groei, maar minder sal poste kry
2011-11-20 11:52
Johannesburg – Die beste van tye, die slegste van tye. Só sal 2012 wees.
Volgens ekonome behoort Suid-Afrika se ekonomie volgende jaar te groei, ondanks die droewige wêreldwye ekonomiese toestande.
Dit is wel ’n uitgemaakte saak dat die werkloosheidskoers van amper 25% nog verder gaan styg in die nuwe jaar.
Vrese bestaan dat Westerse lande en Japan se staatskuld volgende jaar kan handuit ruk en na die res van die wêreld oorspoel en selfs ’n volgende resessie teweeg bring.
Statistieke SA het verlede maand aangekondig 350 000 werkgeleenthede het verlede jaar in Suid-Afrika verlore gegaan.
Sommige ekonome voorspel nog 468 000 werkers kan volgende jaar hul werk verloor.
Dít terwyl die International Labour Organisation nou bevind het Suid-Afrika is een van die lande wat naas Spanje, met ’n werkloosheidsyfer van 20,1%, van die ergste werkloosheidskoerse ter wêreld het.
Volgens die arbeidsmakelaar Adcorp is 49 306 werkgeleenthede net in Augustus afgeskaf.
Mike Schüssler, direkteur van Economists.co.za, sê hy is meer bekommerd oor toenemende werkloosheid as oor ekonomiese groei volgende jaar.
“Die sake-omgewing gaan beslis uitdagend bly.
“Die oorsese skuldkrisis begin al klaar ’n invloed hê op ons ekonomie.
“Dit wil voorkom of ekonomiese groei nie tot die punt van ’n resessie behoort te verswak nie.
“Ek verwag dat ekonomiese groei onder 2,5% gaan wees.
“Dit is beslis nie genoeg om werkskepping te bewerkstellig nie,” sê Schüssler.
Prof. Tommy du Plessis, direkteur van die Potchefstroom Besigheidskool (PBS), sê die meeste plaaslike kleinsakeondernemings is nie in staat om langer as twee jaar lank te oorleef nie.
“Hulle kan bloot nie enige onstuimigheid hanteer nie en wanneer daar ’n insinking is in die ekonomie sluit hulle die een ná die ander hul deure.”
Die probleem is ’n gebrek aan steun en bestuurskundigheid, sê Du Plessis.
Volg Nuus24 op Twitter
- Rapport
