SA-dokter in Ierse hof oor nalatigheid
2011-03-23 07:59
Sasolburg - ’n Dokter van dié dorp is deur ’n bedroefde Ierse weduwee in ’n hooggeregshof in Ierland daarvan beskuldig dat hy na bewering vir haar man se dood verantwoordelik is, omdat hy glo die verkeerde medisyne vir voedselvergiftiging toegedien het.
Dié vrou eis nou skadevergoeding in die hooggeregshof in Cork, Ierland se naasgrootste stad.
Luidens ’n berig in The Irish Times het dr. Johan Dirk van der Meer sy adres by die hof opgegee as “Sasolburg, South Africa” en ook aanspreeklikheid vir die Ier se dood erken.
Gerry Curran, woordvoerder van die Ierse hooggeregshowe, het Dinsdag per e-pos aan Volksblad bevestig Van der Meer staan tereg op ’n aanklag van mediese nalatigheid.
Hy het ook die skadevergoedingseis, maar sonder ’n bedrag, bevestig.
Colm O’Donovan (31) van Dunmanway in die suidweste van Ierland is op 7 Augustus 2004 dood nadat hy vir ’n maagaandoening behandel is, lui die berig verder.
Sy vrou, Patricia, het Van der Meer, asook die organisasie South West Doctors On Call Ltd, wat bedryf word as South Doc, gedagvaar.
Daar word in die hof aangevoer Van der Meer het ten tyde van O’Donovan se dood vir South Doc gewerk en dat dié organisasie plaasvervangend aanspreeklik is vir die dokter se beweerde optrede.
Luidens The Irish Times het mev. O’Donovan voor die hof beweer Van der Meer was nalatig deurdat hy haar man met die verkeerde medisyne, naamlik Largactyl, behandel het.
Dit het wyle O’Donovan se reeds ernstige siekte glo “versnel”.
Van der Meer het na bewering dié inspuiting toegedien nadat ’n ander dokter O’Donovan behandel het, maar hy geen verbetering getoon het nie.
Mev. O’Donovan sê volgens Van der Meer is die gebrek aan verbetering daaraan te wyte dat O’Donovan se liggaam “sleg gereageer” het op die eerste inspuiting, berig die koerant.
Van der Meer het O’Donovan by sy huis gaan inspuit.
In die hofstukke beweer die weduwee Van der Meer het na bewering sy pligte swak uitgevoer deurdat hy haar man nie behoorlik ondersoek het nie, nie na ’n hospitaal verwys het nie, nie O’Donovan as ernstig siek geklassifiseer het nie, en ook nie vaardighede wat van ’n “huisdokter verwag word”, toegepas het nie.
Voorts het Van der Meer glo ook nie ’n tweede mening ingewin oor O’Donovan se siektetoestand nie.
Sy betwis Van der Meer se kwalifikasies en bekwaamheid as huisdokter.
Regter Iarfhlaith O’Neill moet die eis van skadevergoeding bereken, skryf dié Ierse koerant.
Curran sê die verhoor duur vandeesweek voort.
Die prokureursfirma Ernest Cantillion and Company in Cork tree vir mev. O’Donovan op.
- Volksblad