SA bouplan kry vleis
2012-02-10 06:56
Fotogalery - GALERY: Staatsrede 2012
klik op klein foto bo om groter prentjie te sien
Kaapstad – Pres. Jacob Zuma het Donderdagaand oplaas sy presidentskap gefokus met ’n staatsrede vol voorstelle en duidelike beleidsaankondigings.
Die staatshoof se belangrikste aankondigings was op die gebied van infrastruktuur-ontwikkeling en sy mees omstrede stellings was oor grondhervorming en onderwys, waar hy die DA-beheerde Wes-Kaap onverwags geteiken het.
Zuma het wegbeweeg van die vaagheid wat sy vorige staatsredes gekenmerk het en verras met die besonderhede van aangekondigde nuwe projekte.
Hy was ook versoenend deur in sy fokus op die ANC-eeufees ook ander bydraers soos Helen Suzman (DA), Robert Sobukwe (PAC) en Steve Biko (Swart Bewussyn) te huldig.
Die president het hom opnuut verbind tot die letter en gees van die Grondwet, hoewel hy nie spesifiek was oor kommer rakende die onafhanklike regbank en mediavryheid nie.
Ander sleutelkwessies waaroor hy bitter min kwytgeraak het, was die nasionale mediese versekeringsplan en strenger onderwysbestuur, terwyl hy geen uitsluitsel oor nasionalisering gegee het nie.
Die staatsrede het spesifieke planne ingesluit om staatsgedrewe werkskepping deur die uitbreiding van infrastruktuur te verseker, ter bekamping van werkloosheid te midde van die wêreldresessie.
In hierdie verband het hy baie naby gebly aan die bewoording van die nasionale ontwikkelingsplan, wat deur kenners onder leiding van Trevor Manuel, minister in die presidensie, opgestel en die afgelope naweek deur die ANC-leierskorps as beleidsraamwerk aanvaar is.
Oor werkloosheid het Zuma die maklike uitweg gekies deur te fokus op die afname in die laaste kwartaal eerder as die toename die afgelope jaar.
Hy het druk op Eskom geplaas om elektrisiteitspryse nie soveel op te stoot as wat die kragvoorsiener vroeër aangedui het nie.
Aangesien dit volgende jaar ’n eeu sedert die aanvaarding van die Wet op Naturellegrond is, gaan baie klem op grondhervorming val.
“Ons het nog net 8% grond herverdeel, terwyl die teiken 30% is,” het Zuma gesê.
“Die proses is stadig en onopwindend, en daar is algemene instemming dat die beginsel van gewillige koper en verkoper nie die probleem oplos nie,” het hy bygevoeg.
Hy het, verrassend genoeg gegewe die onderwyssituasie, die Wes-Kaap uitgesonder oor die provinsie se uitvalsyfer ná gr.10
Volg Nuus24 op Twitter
- Die Burger
