SA-boer in hof oor grond in Zim
2012-12-18 10:32
Johannesburg – 'n Bejaarde Suid-Afrikaanse boer wat al 50 jaar lank in Zimbabwe boer, sal Vrydag weet of hy van sy plaas afgesit gaan word.
Beeld het Dinsdag berig dat die 72-jarige Piet Henning, wat sedert 1965 grond in die Chiredzi-distrik in die suidooste van die land besit, Vrydag "vir die 27ste of 28ste keer" op aanklagte van die onwettige besit van staatsgrond in die hof moet verskyn.
Dié “staatsgrond” is die opstal en die oorspronklike plaas van 81 hektaar wat
hy oorgehou het nadat sy suikerlande van meer as 200 hektaar reeds in 2003
gekonfiskeer is.
Henning wat saam met sy seun, Greig, boer het op 'n stadium drie plase gehad, maar die ander twee is teen 2009 heeltemal vernietig.
Hy moes die afgelope drie jaar elke ses weke in die hof verskyn.
Pres. Robert Mugabe se regering probeer die afgelope 12 jaar om wit kommersiële boer van hul plase te verdryf en van die oorspronklike 5 000 boere is daar vandag slegs 221 oor.
"Ek verwag om skuldig bevind te word," het Henning Maandag gesê.
Die Zimbabwiese prokureur-generaal en die sekretaris van justisie het aan die howe opdrag gegee dat geen wit kommersiële boer vrygespreek mag word van grondkwessies nie.
Volg Nuus24 op Twitter.
- SAPA
