SA bel Zuma se lyn aan die brand
2009-09-15 18:57
Pretoria - Pres. Jacob Zuma se tolvrye presidentsklagtelyn het Dinsdag tussen 06:00 en 13:30 meer as 11,959 oproepe ontvang en die telefoon het nog nie ophou lui nie.
Vusi Mona, woordvoerder, het gesê die volumes oproepe wat deurkom strek vanaf 1100 tot 1500 per uur.
"In die laaste uur het ons sowat 1158 oproepe ontvang. 8001 mense het deurgekom tot by die verwelkomingsboodskap en het hul taalkeuse gemaak. 3958 het nie deurgekom nie."
Van die 8001 oproepe wat deurgekom en 'n taalkeuse gemaak is, is 492 oproepe beantwoord deur agente. Die oorblywende 7509 kon weens die hoë volume oproepe nie beantwoord word nie.
"Sowat 60% van die oproepe wat deurkom is fopoproepe of word deur swak konneksie afgesny."
31 mense hanteer die oproepe en afhangend van die klagte herlei dit na regeringsdepartemente en provinsiale regerings regoor die land.
Zuma het in Mei tydens sy “dankie sê”-toer in Soweto en Alexandra belowe sy regering gaan toeganklik en aanspreeklik wees.
Hy het tóé onderneem om ’n klagtelyn in sy kantoor te installeer waar mense oor dienslewering en ander kwessies kan kla.
Hy het ook onderneem om terugvoering te gee oor hoeveel oproepe die klagtekantoor ontvang en wat die aard van die probleme is.
Die nommer is 17737.
– Sapa