SA-babastoel wêreldwyd herroep
2012-08-17 07:15
Kaapstad – Meer as vier miljoen Bumbo-babastoeltjies, wat deur 'n Suid-Afrikaanse maatskappy vervaardig word, is wêreldwyd herroep, het die Cape Argus berig.
Dít volg nadat ouers beserings, insluitend skedelbreuke, bloedneuse en beserings aan die kinders se lippe, aangemeld het, het die Bumbo International Trust en owerhede in Kanada en Amerika gesê.
Die stoeltjie word in Gauteng vervaardig en word steeds in Suid-Afrikaanse winkels verkoop.
Sedert 2007, toe die produk aanvanklik herroep is, is minstens 50 voorvalle van beserings in Amerika aangemeld.
Die maatskappy het gesê die herroepping is nie wat verbruikers sal verwag nie en dat die produk steeds in Amerika, Kanada en Suid-Afrika verkoop sal word.
'n Veiligheidsband sal gratis aan klante, wat reeds die stoeltjie gekoop het, gegee word en die band sal op al die nuwe stoeltjies aangebring word.
Bumbo International het ouers in Suid-Afrika aangeraai om 'n e-pos aan info@bumbo.co.za te stuur om 'n stoeltjie te bestel wat 'n veiligheidsband, instruksies en nuwe waarskuwingsplakkers insluit.
– Lees meer hier
– Volg Nuus24 op Twitter
