Persraad gaan kode, grondwet hersien
2010-08-27 07:25
Kaapstad. – Die Suid-Afrikaanse Persraad gaan sy grondwet, die Suid-Afrikaanse Perskode en sy klagteprosedure hersien.
Die Persraad het in ’n verklaring gesê dié besluit is geneem na aanleiding van die debat wat ontstaan het oor die ANC se plan om ’n media-appèltribunaal in te stel.
Die ondersoek gaan gedoen word onder leiding van Bewyn Petersen (adjunkvoorsitter van die Persraad en openbare verteenwoordiger in dié raad), Moegsien Williams (redakteur van die Star) en prof. Franz Krüger van die departmenet joernalistiek aan die Universiteit van die Witwatersrand en mediaverteenwoordiger in die Pers-appèlpaneel, Pap.
Simon Mantel (sakeman en openbare verteenwoordiger in die Pap), Peter Mann (sakeman, oudjoernalis en mediaverteenwoordiger in die Pap) en Susan Smuts (adjunk- besturende redakteur van die Sunday Times en mediaverteenwoordiger in die Pap) is ook op die taakspan.
Enige individu of organisasie in Suid-Afrika kan voorstelle oor moontlike veranderings in die Persombudsman se kantoor se stelsels doen.
Die betrokke dokumente waarop kommentaar gevra word, is beskikbaar by www.presscouncil.org.za of kan skriftelik aangevra word by die Persombudsman se kantoor by mellicentg@ombudsman.org.za of by faks 0114843619.
- Die Burger