SA Airlink se toekoms vandag bekend
2009-12-14 08:02
Fanie van Rooyen
Johannesburg - Die minister van vervoer besluit vandag oor die toekoms van SA Airlink nadat dié lugdiens in drie vliegongelukke die afgelope paar maande betrokke was.
S’bu Ndebele het luidens ’n verklaring Vrydagaand ’n verslag oor dié lugdiens, wat deur die Burgerlugvaartowerheid (BLO) saamgestel is, ontvang.
“Ons het op 11 Desember ’n verslag ontvang wat deel uitmaak van die algemene oudit wat deur die BLO op SA Airlink gedoen is,” het Ndebele gesê.
Thami Ngidi, woordvoerder van die departement, het gister gesê die BLO het namens die minister oor die naweek met SA Airlink vergader om hul kans te gee om hul saak te stel en antwoorde te gee op die vrae wat in die verslag gestel word.
“Die minister sal môre die tweede verslag van die BLO, oor hul vergadering met SA Airlink, ontvang en daarna sal die BLO-verslae se bevindinge bekend gemaak word en ’n besluit sal geneem word oor die toekoms van die lugdiens,” het Ngidi gesê.
Hy het gesê dit is van groot belang om “die lug so gou moontlik te suiwer”.
Dit kom nadat ’n SA Airlink-vliegtuig verlede week met meer as 30 passasiers by die George-lughawe van die aanloopbaan geloop en op die N2-hoofweg tot stilstand gekom het.
Niemand is in die ongeluk beseer nie.
Op 2 Julie het ’n SA Airlink-vliegtuig twee keer onklaar geraak op pad na Nelspruit.
Op 24 September moes nog ’n Airlink-vliegtuig ’n pletterlanding in Durban doen.
Kapt. Alistair Freeman, die vlieënier, is later aan sy beserings dood.
Op 18 November het ’n Airlink-vliegtuig met 32 passasiers van die aanloopbaan by die Port Elizabeth-lughawe geloop.
Afhangende van die bevindinge van die BLO-verslag en SA Airlink se antwoord op die verslag kan Ndebele besluit om die bedryf van die lugdiens te staak, om die lugdiens tyd te gee om moontlike probleme op te los of om die lugdiens “gesond” te verklaar.
- Beeld