Ryk Neethling se ma byna geskiet
2010-05-25 08:36
Mia Willemse, Beeld
Johannesburg - Die swemmer Ryk Neethling se ma, San-Marié, het ’n noue ontkoming met drie rowers in sy huis in Lynnwood, Pretoria, gehad toe een haar aan die keel gegryp en ’n ander een ’n skoot afgevuur het.
Hy het mis geskiet.
Dit is die vierde misdaadvoorval in die swemmer se huis die afgelope vier jaar.
In 2006 was hy twee keer die slagoffer van huisbrake en in 2007 weer ’n keer.
In dieselfde jaar is San-Marié Neethling in Johannesburg deur ’n breek-en-grypdief in die gesig geslaan toe sy en haar gesin op pad was om vir hul dogter, Elsje Neethling-Blair, in die Wilgeheuwel Life-hospitaal in Roodepoort te gaan kuier.
Ao. Dwayne Lightfoot, polisiewoordvoerder, het Maandag gesê die voorval het Sondag omstreeks 16:30 gebeur.
“San-Marié Neethling was op die boonste verdieping toe sy die honde hoor blaf.
“Sy het by ’n venster uitgekyk en gesien hoe drie verdagte mans die elektriese hek by die oprit se motor afbreek en die hek oopforseer.”
Lightfoot het gesê hulle vermoed die mans is tussen 25 en 27 jaar oud.
Volgens hom het mev. Neethling by die trappe af gestap tot op die grondvloer waar sy haar in die twee van hulle vasgeloop het.
Die derde een het in ’n motor by die oprit vir die ander twee gesit en wag.
Volgens Lightfoot het een van die twee mans mev. Neethling aan die keel gegryp, maar sy het haarself losgewikkel en uit die huis gehardloop.
“Die man in die motor het geskreeu sy moet ophou hardloop, anders gaan hy skiet. Sy het nie gestop nie en toe skiet hy.”
Volgens Lightfoot het San-Marié Neethling, wat nie raak geskiet is nie, net aanhou hardloop.
Intussen het die ander twee ’n plasma-TV uit die huis gedra en in die motor waarin hul makker gewag het gespring, waarna hulle weggejaag het.
Dit is al wat hulle gebuit het.
San-Marié Neethling het aan Volksblad gesê sy wil eers met haar seun, wat elders in Afrika is, praat voordat sy kommentaar lewer.
Die polisie ondersoek die voorval.
Niemand is nog in hegtenis geneem nie.
Volg Beeld op Twitter.
