'Rus in Vrede, Broer Leier,' sê ANC-jeugliga
2011-10-21 23:11
Johannesburg – Die ANC-jeugliga het hulde betoon aan die gesneuwelde Muammar Gaddafi as ‘n anti-imperialistiese martelaar en wou weet wie volgende sal wees.
“Broer Leier is meedoënloos deur rebelle-magte, wat deur Navo bewapen is, doodgemaak.
“Navo het Libië binnegeval om hul hande op dié land se natuurlike hulpbronne te kry,” het ‘n woordvoerder vir die ANC-jeugliga Floyd Shivambu in ‘n verklaring gesê.
Die verklaring is gemaak ná foto’s van Gaddafi se bebloede lyk wêreldwyd gepubliseer is.
Hy is volgens berigte naby Sirte doodgeskiet waar hy in ‘n beton-pyp weggekruip het.
Volgens Shivambu het Gaddafi imperialistiese oorheersing in Afrika teengestaan en nooit tot die dreinering van natuurlike hulpbronne in Afrika ingestem het nie.
Hy het, volgens Shivambu, besef dat dié gebruik moet word vir die opbouing van Afrika-nasies.
Shivambu het verder gesê dat die doodmaak van Gaddafi “as inspirasie dien vir vryheidsvegters dwarsoor die wêreld”.
“Soos Kolonel Gaddafi, sal ons tot die bitter einde veg en is ons gereed om die hoogste prys te betaal sodat Suid-Afrika en Suid-Afrika se hulpbronne in die regmatige eienaars se hande bly,” het hy namens die ANC-jeugliga gesê.
Hy het gesê dat die stryd om ekonomiese vryheid nooit maklik sal wees nie, want imperialistiese agente infiltreer die onderdruktes en beeld anti-imperialistiese vegters, soos Gaddafi, as die vyand uit.
Shivambu het gesê dat die enigste gepasde reaksie op Gaddafi se dood ‘n hernude toewyding tot die stryd om ekonomiese vryheid “in ons leeftyd”.
“Die enigste vraag wat ons kan vra is: Wie is volgende?
“Rus in Vrede, Broer Leier,” het Shivambu gesê.
Volg Nuus24 op Twitter.
- SAPA