Ruda Landman keelvol vir rassisme
2011-10-09 09:56
Johannesburg – Sy is keelvol daarvoor dat rassiste aanneem sy is een van hulle net omdat sy wit is.
Daarom gaan sy nie meer stilbly as mense met haar rassistiese geselsies probeer aanknoop nie, het ’n verontwaardigde Ruda Landman die afgelope week aan Rapport gesê.
Landman, gerekende TV-joernalis, het die stryd verklaar teen nie net rassisme nie, maar ook teen stilswye oor rassisme, nadat iemand haar by die Clover Aardklop-kunstefees ongevraagd by ’n neerhalende gesprek oor swart mense probeer betrek het.
Landman vertel sy was Maandagaand op die Aardklop-feesterrein op Potchefstroom waar sy saam met ’n groep vreemdelinge gewag het vir ’n taxi wat feesgangers op die terrein rondkarwei.
Meteens het ’n vreemde vrou, wat haar as TV-persoonlikheid herken het, nader gestaan en gevra hoekom daar soveel Engelse en swart mense op M-Net te sien is. “Jy kan deesdae op elke kanaal ‘pick-a-boy’ speel,” het die vrou gesê en aanbeweeg voordat Landman haar kon antwoord.
Sedertdien kan sy haarself skop dat sy nie die geleentheid gebruik het om die vrou te vertel wat sy van haar rassistiese idees dink nie.
“Daar is ’n aanname by sulke mense dat jy met hul praatjies sal saamstem.”
Die afgelope Donderdag het Landman selfs by ’n openbare lesing uit die gehoor opgestaan om haar spyt oor die voorval met ander feesgangers te deel.
“Ons moet ophou om uit ordentlikheid stil te bly as mense sulke dinge kwytraak,” het sy ná die tyd aan Rapport gesê. “Ek is skaam oor wat gebeur het. Daardie vrou het daar weggeloop onder die indruk dat ek met haar saamgestem het omdat ek niks gesê het nie. Ons gaan almal moet leer om daardie soort rassisme te konfronteer.”
Volg Nuus24 op Twitter
- Rapport