Ruby Marais móét tronk toe gaan, sê konstitusionele hof
2010-09-22 08:48
Kaapstad – Die huurmoordenares Ruby Marais se aansoek om teen haar lewenslange tronkstraf te appelleer, veral op grond van die mishandeldevrou-sindroom, is gister eenparig deur tien regters van die konstitusionele hof verwerp.
Marais is in die rondgaande hof in Swellendam daaraan skuldig bevind dat sy mense gehuur het om haar man, Basie, in Oktober 2006 op ’n bouperseel langs hul huis in Jongensfontein te vermoor.
Die moord was besonder grusaam.
Die hooggeregshof het Marias se verweer dat sy erg deur haar man mishandel is, as leuens verwerp en bevind dat sy die moord vir geldelike gewin beplan het.
Die regters van die konstitusionele hof het gister gesê die appèlaansoek is inderdaad “skrikwekkend, omdat dit die afgryslike terrein van huishoudelike geweld” betree.
Hulle het egter bevind dat die grondwetlike grond waarop Marais aansoek om appèl doen – dat sy geen billike en regverdige verhoor gehad het nie – in werklikheid geen grondwetlike grond is nie omdat dit by nadere ondersoek op niks anders nie as ’n aanval op die feitebevindinge van die hooggeregshof neerkom.
Boonop, het die regters gesê, het Marais hoegenaamd geen aansoek in die konstitusionele hof of die appèlhof (waar haar appèl ook verwerp is) gebring om nuwe getuienis oor die beweerde mishandelings op haar aan te bied nie.
Vir Marais is dit einde van die pad. Sy sal lewenslange tronkstraf moet uitdien.