Rubberkoeëls vlieg in De Doorns

2013-01-09 14:14

Kaapstad – Die polisie het Woensdagmiddag rubberkoeëls gebruik om stakende plaaswerkers in De Doorns in die Wes-Kaap uitmekaar te jaag.

Die hoofpad wat van die N1 na die dorp lei was met rubberkoeël-houers besaai ná betogers met die polisie gebots het.

Die betoging het deel gevorm van die eerste dag van die plaaswerkers se hernieude staking.

Minstens 50 mense is in hegtenis geneem toe stakings in die Wes-Kaap gewelddadig geraak het.

Lt.kol. André Traut sê die onlustepolisie is ontbied om die situasie in De Doorns te monitor.

Hy sê “min of meer” 50 mense is vasgetrek sedert die stakings vroegoggend begin het.

Betogers het motors met klippe bestook, waarna paaie afgesper is. Motoriste moes alternatiewe roetes gebruik toe die N1 buite De Doorns ook gesluit is.

Wes-Kaapse plaaswerkers het laat verlede jaar begin staak, en geëis dat hul lone van R69 na R150 per dag verhoog word. Werkers het ook op 'n beter grondhervormingsprogram aangedring.

Die hoogste aanbod wat boere sedertdien gemaak het, is R80.

– Volg Nuus24 op Twitter.

- SAPA