Rowers vas nog voor hul kan steel
2009-10-23 03:27
Itsoseng, Noordwes- Ses mans wat glo ‘n rooftog in Mafikeng beplan het is in hegtenis geneem nog voor hulle dié roof kon uitvoer.
Die verdagtes is Sondag in hegtenis geneem nadat lede van die gemeenskap polisie van hulle planne in kennis gestel het. Hulle is vasgetrek terwyl hulle na Mafikeng onderweg was om blykbaar die rooftog uit te voer.
Polisie het hulle voertuig in Bethel van die pad afgetrek. Daar is op twee vuurwapens, insluitende ‘n tuisgemaakte geweer, beslaggelê en nadat inligting van een van die verdagtes gekry is, is nog ‘n vuurwapen in Mafikeng gekonfiskeer.
Die verdagtes was na bewering van plan om ‘n reeks rooftogte in en om Mafikeng en Itsoseng te pleeg.
Die saak word nog ondersoek en die verdagtes sal Vrydag in die hof verskyn om borgtog vas te stel.