Rowers teiken gesin vir diamant
2009-11-25 10:07
Kimberley - ’n Inwoner van die stad wat vir ’n gelisensieerde diamanthandelaar werk, is Dinsdag na bewering van onder meer ’n baie groot geslypte diamant van sowat R1,5 miljoen beroof toe vier rowers hom, sy vrou en hul seuns verras het toe hulle by die huis aankom.
Dié diamant behoort aan die eienaar van die onderneming waar Quinton van Wyk (45) werk.
Van Wyk, sy vrou Sonja en hulle seun Ulysses was in die Kaap vir die naweek. Met hulle aankoms by die huis het vier gewapende verdagtes met ‘n Toyota Fortuner voor hulle by die oprit ingejaag.
Die mans het uitgespring en hulle wapens op Van Wyk, sy vrou en hul seun gerig. Een van die mans het die gesin se bagasie in die Toyota begin laai.
Die diamant was na bewering in een van die sakke.
Die polisie is ontbied maar die rowers het gevlug nog voor hulle aankoms op die toneel.
Sr.supt. Sam Sesing, polisiewoordvoerder, het die voorval bevestig. Geen verdagtes is nog in hegtenis geneem nie.
–Volksblad