Rowers slaan vrou (81) erg in aftreeoord-huis
2012-01-11 08:01
Johannesburg – ’n Bejaarde vrou van Bronkhorstspruit is so erg deur rowers in die gesig geslaan in haar huis in ’n aftreeoord dat haar gesondheid erg agteruitgaan weens die skok van die aanval.
Ria van Niekerk (81) lê in ’n kritieke toestand in die waakeenheid van die Wilgers-hospitaal in Pretoria.
Twee rowers het haar Saterdagoggend vroeg in haar huis vasgebind en erg in die gesig geslaan.
“My ma was Saterdag kort ná die aanval eintlik baie kalm. Sy het ons presies vertel wat gebeur het en geen verwyte gehad nie.
Soos die skok stelselmatig ingetree het, het haar toestand egter al hoe meer versleg en dit gaan regtig nie goed met haar nie,” het me. Jani Combrink (51), een van Van Niekerk se drie dogters, gister gesê.
Van Niekerk se hart het glo in ’n stadium gaan staan en sy is tans aan ’n ventilator gekoppel.
“Sy kan op die oomblik nie self asemhaal nie en haar bloeddruk is baie laag,” het Combrink gesê.
Dries Schreuder (59), Van Niekerk se skoonseun, het gesê ’n dokter het aan die familie gesê sy skoonma “het ’n skraal kans om te oorleef”.
Die rowers het volgens Combrink Saterdagoggend omstreeks 02:00 by die Ons Hoekie-aftree-oord oor Van Niekerk se muur gespring, ’n slaapkamervenster gebreek en daardeur geklim.
“Hulle het my ma se voete met ’n belt en haar hande met ’n serp vasgebind en nog ’n serp oor haar mond gebind,” het Combrink gesê.
“Hulle het haar so in die gesig geslaan dat haar oë bloedrooi en byna toegeswel was.”
Die twee rowers het Van Niekerk haar motorsleutels gevra en met haar TV, ’n radio en juwele in haar wit Mercedes-Benz A-klas gevlug.
Van Niekerk het haar losgewoel en moes daarna byna 200m loop om by ’n buurman hulp te gaan vra omdat haar naaste buurman nie tuis was nie.
Combrink het gesê haar ma was voor die aanval baie aktief en onafhanklik.
“Sy het alleen gebly, self rondgery en in die tuin gewerk. Sy was glad nie sieklik en hulpeloos nie.”
Combrink glo die rowers het haar ma moontlik as teiken gekies omdat sy alleen gebly en ’n motor gehad het.
Johannes Japhta, polisiewoordvoerder, het gesê die polisie ondersoek sake van huisroof en poging tot moord.
Niemand is nog in hegtenis geneem nie.
Enigeen met inligting oor die voortvlugtiges of wat die gesteelde wit Mercedes-Benz (registrasienommer PWV 715 GP) opgemerk het, kan ao. Tosen by 082 698 8032 bel of die Bronkhorstspruit-speurtak by 013 932 9200.
– Volg Nuus24 op Twitter
- Beeld