Rowers skiet klant buite Builders Warehouse dood
2012-02-22 11:11
Johannesburg – ‘n Motoreienaar is doodgeskiet toe gewapende mans die voertuig in die parkeerterrein van ‘n Builders Warehouse wou kaap, het Massmart gesê.
Die voorval het Woensdagoggend net ná 06:00 in Sandton, Johannesburg, plaasgevind, het Massmart – wat Builders Warehouse besit – in ‘n verklaring gesê.
Die gewapende mans het die winkel verlaat en ‘n lid van die publiek, wat in die parkeerterrein stilgehou het, gekonfronteer, lui die verklaring.
Daar word vermoed dat die rowers ‘n wegkommotor wou kaap.
“’n Struweling het ontstaan en... ons moet met diepste en uiterste spyt bevestig dat die eienaar van die voertuig geskiet en noodlottig gewond is.”
Die maatskappy sê die mans het die winkel verlaat nadat hulle daarin misluk het om die kluis te steel.
Kapt. Kym Cloete sê werknemers en veiligheidswagte was besig om die winkel oop te sluit toe ‘n man hulle genader het. Die man het ‘n sekuriteitsuniform aangehad.
Die man het hulle met ‘n vuurwapen aangehou nadat hulle hom ingelaat het. Drie ander mans het by hom aangesluit.
Cloete sê die verdagtes wou kontant hê, maar “die werknemer is aangerand toe hy nie die kluis kon oopsluit nie.”
Op daardie oomblik het twee manlike klante by die winkel opgedaag en een van hulle is geskiet, het sy gesê.
Massmart sê die winkel sal vandag gesluit wees.
Volg Nuus24 op Twitter
- SAPA