Rowers se koeël verlam man dalk
2010-12-30 07:15
Cobus Claassen en Buks Viljoen
Johannesburg - ’n Jong man sal waarskynlik nooit weer kan loop nie nadat ’n rowerskoeël sy rugstring getref het.
Gordon Cooke (27) en sy verloofde, Bianca Barrand, is in hul woonstel op ’n kleinhoewe in Jackaroo, net buite eMalahleni (Witbank), oorrompel en beroof.
Hulle was van plan om op 19 Februarie te trou.
Cooke het Sondag omstreeks 01:00 op die rowers afgekom toe hy ná werk tuis gekom het. Barrand en die paartjie se babadogter, Abigail (agt maande), het geslaap toe die rowers op Cooke toegeslaan het.
Hy het in ’n struweling met een van die rowers betrokke geraak en ’n koeël het hom tussen die nek en linkerskouer getref. Die koeël is deur sy rugstring.
Sy dokter sê daar is ’n skrale moontlikheid dat hy weer sal kan loop.
Cooke het Woensdag uit sy hospitaalbed in Centurion gesê hy is bly sy geliefdes het niks oorgekom nie.
Barrand sê sy het met Abigail op die vloer onder ’n kombers gaan lê.
“Ek het Gordon hoor skreeu, maar al wat deur my gedagtes gegaan het, is dat ek my kind moet beskerm.”
Die rowers het ’n wasmasjien op Cooke omgekeer voordat hulle met sy aktetas, ’n TV-stel en Barrand se beursie gevlug het.
“Ek is opgehuil en daar is nie meer emosie oor nie. Ons lewe is oornag onderstebo gegooi en ’n onverwagse lewenstryd wag nou,” sê Barrand.
Die polisie ondersoek die moontlikheid dat dieselfde bende twee weke gelede Jannie Brits, ’n tronkbewaarder, by sy huis op die gevangenisterrein buite die dorp doodgeskiet het. Die bende kan dalk met nog ’n gewapende rooftog, skaars 2 km van Cooke se woonstel, verbind word.
In al die voorvalle is met ’n .765 kaliber pistool geskiet.
Skaars 48 uur nadat Cooke geskiet is, het drie rowers op ’n kleinhoewe toegeslaan.
Volgens kapt. Eddie Hall, polisiewoordvoerder, het Martin Mare van Kromdraai, hoewe 132, Dinsdag omstreeks 02:50 wakker geword van ’n geraas in die huis.
Hy het na die kombuis gestap waar hy hom trompop teen drie gewapende mans vasgeloop het.
Een van die mans het hom met ’n .765 pistool in die maag geskiet.
Mare word in die Life Kosmos-hospitaal in eMalahleni behandel.
Hall sê ’n taakspan is ná die moord op Brits aangestel.
“Omdat dieselfde kaliber vuurwapen gebruik is, het die taakspan nou hul ondersoek uitgebrei om die twee jongste voorvalle in te sluit.”
- Beeld