Rowers met AK-47's blaas kitsbank op

2012-08-22 09:10

Johannesburg – ‘n Man is gewond toe rowers wat met AK-47-aanvalsgewere gewapen was, ‘n OTM opgeblaas en op verbygangers losgebrand het, het die polisie gesê.

Ao. Kay Makhubela sê vyf rowers het Dinsdagaand om 20:00 in ‘n Volkswagen Polo Vivo by die Makhetheng-winkelsentrum in Naledi, Soweto, opgedaag. Die winkels was reeds toe.

“Die vyf mans het plofstof in ‘n [Absa] OTM geplaas en dit het later ontplof,” het hy gesê.

“Die polisie het die ontploffing gehoor en gaan kyk waar dit gebeur het.”

‘n Man wat verby die toneel gestap het, is in die boud geskiet toe die rowers hoor die polisie is op pad.

Die rowers het met ‘n onbekende hoeveelheid geld op die vlug geslaan.

‘n Ooggetuie het aan die polisie gesê drie van die rowers het aanvalsgewere gedra en die ander twee het rewolwers by hulle gehad.

Volg Nuus24 op Twitter  

- SAPA