Twee rowers gewond in skietgeveg
2012-08-19 22:38
Johannesburg – Twee rowers is Sondagmiddag tydens 'n skietgeveg met die polisie gewond terwyl hulle probeer het om 'n besigheid in Protea Glen, Soweto te beroof, het die Gautengse polisie gesê.
Drie mans in 'n blou Toyota Conquest het na dr. Iyanda Zulu se spreekkamer gegaan, het ao. Kay Makhubele gesê.
Twee van die mans het ingegaan en gemaak asof hulle die dokter wou sien. Hulle het die spreekkamer na 'n tyd verlaat waarna 'n polisebeampte in privaatklere, wat ook die dokter wou sien, agtergekom het alles is nie pluis nie.
Hy het 'n kollega, wat van diens af was, om hulp gekontak.
"Toe die verdagtes terug in die spreekkamer gaan het hulle almal met 'n vuurwapen aangehou en aan die pasiënte gesê om op die grond te lê."
Hulle het die dokter vasgemaak en geblinddoek. Terwyl hulle die dokter se skootrekenaar en medikasie na hul motor geneem het, het twee polisiebeamptes die verdagtes saam met die bestuurder van hul motor ingewag.
Toe die polisiebeamptes hulle beveel om hul hande in die lug te hou, het hulle begin skiet. Die beamptes het teruggeskiet waarna een verdagte in sy maag en been geskiet is.
"Die ander verdagte is in sy sitvlak geskiet. Die koeël het regdeur sy liggaam gegaan en by sy geslagsdele uitgekom."
Die gewapende mans is onder polisiebewaking na 'n hospitaal geneem. Die bestuurder van die motor is ook in hegtenis geneem.
Al drie verdagtes sal binnekort in die Protea-landdroshof verskyn.
– Volg Nuus24 op Twitter.
- SAPA
