Rowers gee slagoffer R50 vir petrol

2012-10-25 10:02

Durban – ‘n Jong vrou het twee mans wat by haar huis ingebreek het, na ‘n informele nedersetting geneem aangesien hulle nie kon bestuur nie en ‘n wegkommotor nodig gehad het.

The Mercury berig die rowers het ook R50 vir Simone Holmes (24) gegee sodat sy petrol kon koop.

Holmes het verlede week na haar huis in Durban-Noord teruggekeer terwyl die twee jong inbrekers – ‘n tiener en ‘n man in sy 20’s – besig was om haar huis om te keer. Haar huishulp was reeds vasgebind.

Een van die mans het haar met ‘n skroewedraaier aangehou.

Volgens die koerant het die inbrekers geld, drie skootrekenaars, ‘n rekenaar, Holmes se Franse paspoort en haar woonstelmaat se klere gesteel.

“Hulle het vir my gesê hulle kan nie bestuur nie... en dat ek hulle moet vat,” het die vrou vertel.

“Ek het paniekerig geraak aangesien ek geen petrol gehad het nie... So die ou het R50 van my geld vir my teruggegee...”

Holmes het die mans in KwaMashu afgelaai en die voorval by die polisie aangemeld.

Lees meer hier

Volg Nuus24 op Twitter