Rowers breek boer se arm met houtstomp
2009-10-28 07:31
Johannesburg - ’n Bekende beesboer van Barberton is vermoedelik met sy eie knipmes in die rug gesteek nadat sy aanvallers sy een arm met ’n houtstomp gebreek het.
Hulle het sy vrou ook geslaan en gedreig om haar te verkrag tensy sy die kluis oopsluit.
Vyf mans, een met ’n handwapen, het Amy Williams (60) Saterdag omstreeks 13:30 oorval terwyl sy watersproeiers op hul plaas, Scotston, geskuif het, het kapt. Barry Rudolph van die polisie in Barberton gesê.
Donald Williams (66), wat met santa gertrudis-beeste boer, het in die hoofslaapkamer gesit en koerant lees.
Toe ’n aanvaller Williams gryp, het een van haar drie boerboele glo op hulle afgestorm.
Die rowers het die dier doodgeskiet.
Hulle het Williams, wat in ’n stadium die noodknoppie gedruk het, by die huis ingesleep.
Die rowers het volgehou hulle soek geld, het Rudolph gesê.
Mnr. Williams het die lawaai gehoor. Toe hy gaan kyk wat aangaan, het twee van die aanvallers hom in die gang oorval.
Volgens Rudolph is Williams so erg met ’n stuk stomp aangerand dat sy regterarm gebreek is. Hy is ook met ’n mes in die lae rug gesteek.
Die rowers het mev. Williams glo in ’n stadium gedreig hulle gaan haar verkrag as sy nie die kluis oopsluit nie. Sy is ook verskeie keer met ’n stomp voorwerp, vermoedelik ’n stuk hout, aangerand.
Sy het die kluis vir die rowers oopgemaak. Hulle het ’n 410-haelgeweer en ’n handwapen (waarvan die kaliber nog onbekend is) uit die kluis geneem.
Die rowers het ook die egpaar se selfone gebuit en gevlug.
Mnr. Williams is met ’n Air Mercy Services-helikopter van die Rooi Kruis na die Medi-Clinic in die dorp geneem. Sy toestand is gistermiddag as bestendig beskryf.
Mev. Williams is oornag in die hospitaal opgeneem vir waarneming en Sondagoggend ontslaan.
- Beeld