Rower wurg 9-jarige seun, kry agt jaar
2011-03-12 09:13
Kimberley – Iemand wat by ’n huis inbreek en ’n egpaar se negejarige kind verniel, verdien ’n pak slae. Dit is ook in die gemeenskap se belang dat só ’n rower ’n lang tronkstraf opgelê word.
Só het ’n streekhofaanklaer gister betoog voordat ’n streekhoflanddros Jacobus Kgatlane (33) van Greenpoint tot agt jaar gevangenisstraf weens huisbraak met die opset om te steel en roof gevonnis het.
Kgatlane, ’n werklose man, het die middag van 9 November verlede jaar by die huis van Ivan en Margareth Tolmay in die woonbuurt Herlear ingebreek terwyl hul seuntjie alleen tuis was.
Toe hy die kind gewaar, het hy hom vasgehou en gewurg. Hy het kaste in die vertrekke oopgeruk en goed uitgegooi.
Die egpaar het Kgatlane op heter daad by hul spruit in die huis betrap en ná ’n hewige stoeiery in hegtenis geneem.
Elmar Steyn, die aanklaer, het ter strafverswaring betoog dit is skokkend dat die privaatheid van ’n mens se huis so gruwelik geskend word.
Die egpaar Tolmay werk albei. Me. Tolmay het die knapie die middag met haar selfoon by die huis gelaat om haar man by die werk te gaan haal. Die huis was gesluit.
Kgatlane het die agterdeur oopgebreek en ingegaan.
In die “rillerverhaal” het mnr. Tolmay die booswig laatmiddag hier aangetref waar hy sy seun aan die nek vasgehou het.
In die daaropvolgende stoeiery het Tolmay ’n mes by die aanvaller afgevat en sy hande vasgebind. CD’s en mev. Tolmay se selfoon het uit sy sakke geval.
Mev. Tolmay het kneusings in die geveg opgedoen.
Die polisie het Kgatlane toe op die perseel in hegtenis geneem.
Steyn het gesê hoewel die seuntjie nie ernstig seergekry het nie, het hy sielkundige letsels oorgehou.
Hy kry steeds sielkundige behandeling.
Almal – ryk en arm – loop deur onder diewe wat by private wonings inbreek en kosbare besittings steel.
Streeklanddros Danie Schneider het by vonnisoplegging gesê Kgatlane het drie vorige veroordelings betreffende oneerlikheidsmisdrywe.
Hy is waarskynlik vroeg vrygelaat, want sy nuutste gevangenistermyn weens diefstal verstryk op 21 April. Dit wil voorkom Kgatlane se vorige vonnisse het nie die gewenste uitwerking op hom gehad nie.
Schneider het gesê huisbraak is ’n ernstige misdaad. Huis- en tuinhulpe, kinders, vroue en bejaardes word dikwels aangeval en beseer wanneer ’n dief by ’n woning inbreek.
Die seuntjie het ernstige trauma beleef.
Hy aanvaar dat die rower ten tyde van die voorval in ’n mate aangerand is, maar hy is nie ernstig beseer nie.
Vincent Mayisela van Regshulp Suid-Afrika het vir Kgatlane opgetreë.
- Volg Nuus24 op Twitter.
- Beeld