Rower sterf in skietery in KZN

2012-06-15 16:55

Johannesburg – ‘n Rower is in ‘n skietery met die polisie in Chatsworth in KwaZulu-Natal doodgeskiet, het die polisie gesê.

Lt.kol. Vincent Mdunge sê drie gewapende mans het ‘n motoris op die R602 gedwing om sy motorsleutels aan hulle te oorhandig. Toe hy geweier het, het hulle hom oorval.

Mdunge sê ‘n polisiebeampte wat verby gery het, het besef iets was fout.

Hy het ‘n span ontplooi en die gewapende mans het met die motor op die vlug geslaan. Hulle het ook die motoris se beursie, wat R900 bevat het, gegryp.

Mdunge sê die polisie het die verdagtes agterna gesit.

“Die vlugtende mans het op die polisie geskiet, wat teruggeskiet en een van die rowers doodgeskiet het.”

Die polisie het die tweede man aangekeer. ‘n Derde verdagte is steeds soek.

Die man wat vasgetrek is, sal later in die Chatsworth-landdroshof verskyn.

Volg Nuus24 op Twitter  

- SAPA