Rower skiet homself in die voet
2009-09-04 08:35
Virginia Kepler
Pretoria – ’n Rower wat ’n bejaarde egpaar in hul plaashuis in Tygerpoort, oos van Pretoria, oorval en van ’n haelgeweer beroof het, het homself met dié geweer in die voet geskiet.
Konst. Monique Vermeulen, polisiewoordvoerder, het gesê die egpaar het gisteroggend gesit en koeldrank drink toe twee gewapende mans by hul huis instap.
“Die mans het aan die oumense gesê hulle moet rustig wees en stil sit en dat hulle net ‘’n paar goedjies gaan vat’.”
Terwyl die een verdagte goedere bymekaargemaak het, het die ander hulle met ’n vuurwapen aangehou.
“Die een verdagte het toe ’n haelgeweer uit die oumense se kluis gesteel en terwyl hy na sy makker geloop het, het hy homself met die haelgeweer in die voet geskiet.
“Hulle het so groot geskrik dat hulle net met die haelgeweer en ander klein goedere gevlug het,” het Vermeulen gesê.
Die polisie het gistermiddag met die hulp van snuffelhonde en ’n helikopter na die beseerde rower gesoek deur sy bloedspoor in ’n koppie naby die plaas te volg.
Dié man is teen druktyd nog nie aangekeer nie.
Die egpaar is ongedeerd.
- Beeld