Rower op oud-Bok se plaas doodgeskiet
2010-03-02 14:49
Johannesburg - Die polisie het 'n vermeende rower op die voormalige Springbok-rugbyspeler Chris Rossouw se plaas in Delmas doodgeskiet.
Kapt. Leonard Hlathi, 'n polisiewoordvoerder, het gesê owerhede het inligting van 'n beplande huisroof op Rossouw se plaas, Geluk, ontvang.
"Die polisie het die verdagtes op die plaas ingewag," het hy gesê.
Beamptes het toegeslaan toe die rowers by kantore op die plaas ingaan en rekenaarkabels begin uittrek om toerusting te verwyder.
Een van die mans was gewapen met 'n 7.65mm-pistool.
"Toe hy die vuurwapen oplig in 'n poging om die polisie te skiet, het 'n polisieman hom doodgeskiet," het Hlathi gesê.
Dié man is van Lesotho.
Nóg 'n rower, ook van Lesotho, is in hegtenis geneem.
Drie ander het gevlug en 'n soektog is van stapel gestuur.
Geen van die toerusting is gesteel nie.
Hlathi het gesê die inbrekers was reeds besig om kluise oop te breek toe die polisie op hulle afkom.
"Die verdagtes word ook met ander sake soos gewapende roof en huisroof in Delmas verbind," het hy gesê.
Rossouw was deel van die seëvieriende Springbok-span wat die Wêreldbeker in 1995 gewen het.
Hy besit die plaas saam met sy pa en broer.
Hlathi het gesê die Rossouw-gesin was ten tyde van die voorval in die huis op die plaas.
"Hulle het geweet van die polisie-aksie. Ons wag al vir 'n week op die plaas vir 'n inbraak om te gebeur."
– Sapa