Rower gewond in skietery
2010-09-02 02:32
Johannesburg – ‘n Rower is Woensdagoggend gewond in ‘n skietery op die dak van ‘n huis in Butterworth, het die polisie in die Oos-Kaap gesê.
Die 21-jarige verdagte en twee ander mans het glo vanaf ‘n huis gevlug ná hul dit probeer roof het, toe die polisie opgedaag het.
“Die bure het die polisie gekontak. Met hul aankoms op die toneel het die beamptes die drie verdagtes op die dak van ‘n huis gevind,” het kapt. Lingisile Magama, polisiewoordvoerder, gesê.
“’n Skietery het uitgebreek en een van die rowers is in die skouer gewond.”
Na bewering het die gewapende trio toegang tot die huis verkry deur op die dak te klim.
Volgens Magama is die eienaar van die huis nie in die voorval beseer nie.
Die beseerde rower is in die hospitaal onder polisie-bewaking en die twee ander verdagtes is in hegtenis geneem.
Volg Nuus24 op Twitter.
- SAPA