Rower doodgeskiet tydens inbraak
2012-01-20 16:16
Durban – Een rower is dood en ‘n ander een is beseer tydens ‘n skietery met ‘n polisiekonstabel wat van diens af was in Newdawn Park, Newlands, het die polisie in KwaZulu-Natal Vrydag gesê.
Drie gewapende mans het ‘n 62-jarige vrou Donderdag by haar huis in Newdawn Park beroof.
Hulle het haar in haar sitkamer aangehou en aangedring op geld en die kluissleutel, het kapt. Thulani Zwane gesê.
“Hulle het haar saam met haar seun en dogter in die badkamer toegesluit, voordat hulle die huis beroof het,” het hy gesê.
Die familie het ‘n polisieman wat in ‘n buitegebou op hul erf woon in kennis gestel.
“Terwyl hy die huis genader het, is hy in die bors geskiet. Hy het gevolglik teruggeskiet,” het Zwane gesê.
Die mans het gevolglik gevlug.
“Ons het een van die mans se lyke in ‘n pad in die omgewing gevind en die ander een kon nie beweeg nie as gevolg van sy beserings,” het hy gesê.
Dit was nie bekend of die derde rower beseer is nie.
Die polisie het beslag gelê op ‘n pistool, vier selfone en ‘n rekenaar.
“Die beseerde polisieman, wat in sy vroeë dertigs is, is in ‘n hospitaal opgeneem en gestabiliseer,” het Zwane gesê.
– Volg Nuus24 op Twitter
- SAPA