Rottweiler word dalk van kant gemaak
2012-01-21 10:28
Kaapstad – Die rottweiler wat die tweejarige Meeka Riley Lackay verlede Woensdag op Clifton-strand gebyt het, gaan dalk van kant gemaak word.
Volgens Neil Arendse, woordvoerder van die stadsraad se wetstoepassingsdepartement, het die raad ’n verantwoordelikheid jeens die publiek en hul veiligheid.
“Die moontlikheid is dus sterker dat die hond van kant gemaak kan word,” het hy gesê.
Die hond en sy eienaar, wat homself ’n honde-gedragspesialis en -fluisteraar noem, is sedert verlede week in die kollig nadat dié hond Meeka aan die rug en been gebyt het.
James Lech se hond was nie aan ’n leiband nie en hy is met R1500 beboet.
Die hond word by die Kaap de Goede Hoop Dierebeskermingsvereniging (DBV) in Grassy Park versorg.
Volgens Arendse is die hond nie deur die DBV geëvalueer nie omdat hy reeds bewys het dat hy mense kan byt.
Lech sou vandeesweek ’n verklaring uitreik oor die voorval.
Lech het Vrydag aan Die Burger gesê daar is feite oor die voorval wat nagegaan moet word en dit is die rede hoekom die verklaring nog nie uitgereik is nie.
Volgens Arendse het die stadsraad geen vertoë van Lech ontvang om sy hond terug te kry nie.
- Die Burger