Rossouw se dood 'laat leemte in joernalistiek'
2013-03-12 15:35
Johannesburg – Die dood van die 33-jarige joernalis Mandy Rossouw is 'n verlies vir die veld, het die Nasionale Persklub Dinsdag gesê.
"Op slegs 33, was Mandy toegewy aan haar beroep en word gerespekteer deur almal wat saam met haar gewerk en haar geken het," het Antoinette Slabbert, voorsitter van die Nasionale Persklub, in 'n verklaring gesê.
"Haar ontydige dood is beslis 'n verlies vir die bedryf en sal 'n leemte laat in joernalistiek."
Die persklub het sy medelye met haar familie, vriende en kollegas betuig.
Rossouw het Saterdagaand gekla van erge borspyn en is toe in die Sandton Mediclinic opgeneem en 'n paar uur later ontslaan.
Sy sou Maandag saam met 'n vriendin en 'n kollega gaan uiteet het, maar sy het nie vir die afspraak opgedaag nie. Hulle is toe na haar woonstel, waar hulle haar dood aangetref het.
Die oorsaak van haar dood is nie bekend nie.
Rossouw was sedert 2011 die internasionale groepskorrespondent vir Media24. Vroeër was sy 'n politieke korrespondent vir Media24 en het in 2006 die groep se buitelandse korrespondent in Londen geword.
Haar boek, Kings and Kingmakers, is verlede jaar kort voor die ANC se leierskongres in Mangaung, uitgegee.
Die DA en die regering het ook Rossouw se dood betreur.
Ferial Haffajee, redakteur van City Press, het Rossouw as 'n talentvolle skrywer beskryf.
"Haar lyk is gister [Maandag] gevind nadat sy nie haar foon geantwoord het nie. Ons is verpletter deur die skielike, skokkende verlies van 'n geliefde, goedhartige en talentvolle kollega.
– Volg Nuus24 op Twitter
- SAPA
