Rosestad kry wél nuwe hospitaal
2010-07-21 09:35
Volksblad
Ten spyte van die dreigende gesondheidskrisis in die Vrystaat wat verlede week tot vyf sterftes gelei het, gaan die provinsiale regering voort met die bou van die nuwe ultramoderne hospitaal wat belastingbetalers R452 miljoen uit die sak gaan jaag.
Bouwerk aan die hospitaal, wat die Nasionale Hospitaal in Bloemfontein gaan vervang, gaan in die 2011-’12-boekjaar begin.
Dr. Aaron Motsoaledi, nasionale minister van gesondheid, sê altesaam R30miljoen is vir dié boekjaar begroot.
Hy sê die hospitaal gaan na verwagting in die 2015-’16-boekjaar voltooi wees en sowat R90 miljoen is vir mediese toerusting en meubels begroot.
Jabu Mbalula, woordvoerder van die provinsiale gesondheidsdepartement, het aan Volksblad gesê die hospitaal gaan op munisipale grond oorkant die voormalige Vista-universiteit in die suide van Bloemfontein gebou word. Dit is net sowat 3km van die Pelonomi-hospitaal, die trauma-hospitaal.
Mbalula sê dié ligging sal dit toeganklik maak vir pasiënte wat van onder meer Petrusburg, Boshof en Reddersburg verwys word.
Die Vrystaatse premier, Ace Magashule, het altesaam drie nuwe hospitale – een in Bloemfontein, een op Trompsburg en een op Ladybrand – in Februarie vanjaar in sy provinsiale rede aangekondig. Hy het gesê daar is besluit om dié hospitaal te bou omdat dit meer sou kos om die Nasionale Hospitaal op te knap.
Motsoaledi sê die nuwe hospitaal gaan onder meer ’n noodeenheid, twee teaters en verskeie sale insluit. Hy sê dit gaan altesaam 400 beddens hê.
Dit gaan dus groter as die Medi-Clinic in Bloemfontein wees wat 377 beddens het. Hierdie hospitaal het egter altesaam 12 teaters.
Die Nasionale Hospitaal-gebou gaan, volgens Motsoaledi, in ’n sentrum vir gemeenskapgesondheid omgeskep word. Hierdie sentrum gaan steeds onkologie-dienste bied.
Die bou van die nuwe hospitaal het baie kritiek uitgelok weens die probleme waaronder die provinsiale gesondheidsdepartement gebuk gaan.
Dié departement het meer as 12000 vakante poste en is miljoene rande agterstallig met die aankoop en opgradering van mediese toerusting.
Luidens ’n verslag van die portefeuljekomitee vir gesondheid en maatskaplike ontwikkeling is daar ’n kritieke tekort aan medisyne en ambulanse by die meeste van die hospitale in die provinsie.)?Intussen het Volksblad vertroulik verneem dat die Vrystaatse gesondheidsdepartement ’n taakspan aangestel het om die vyf sterftes by die MUCPP-gemeenskapsdienssentrum in Bloemfontein te ondersoek. Dié kritieke pasiënte is in dié sentrum se siekeboeg opgeneem vir behandeling pleks van in die hospitaal.
Mbalulasê dit is ongehoord dat ’n pasiënt in ’n kritieke toestand na die MUCPP verwys word. Die sentrum kan volgens hom nie die behandeling bied wat ’n pasiënt in ’n kritieke toestand nodig het nie.
- Volksblad