Rooi ligte: Kapenaars daagliks beboet

2012-12-05 10:45

Kaapstad – Meer as 80 motoriste word daagliks in die Moederstad beboet omdat hulle rooi verkeersligte verontagsaam.

Cape Times berig meer as 30 000 boetes is verlede jaar in die stad uitgereik aan mense wat oor rooi verkeersligte gery het. Dit vorm deel van die sowat 1,5 miljoen boetes wat in totaal uitgeskryf is.

Die adjunk-verkeershoof André Nel sê die stad kan nie nóg kameras installeer nie, aangesien howe nie die kapasiteit het om addisionele oortreders te vervolg nie.

JP Smith, burgemeesterskomiteelid vir veiligheid en sekuriteit, sê die stad is bereid om jaarliks R1,9 miljoen uit te gee om die salarisse van ekstra landdrosse en aanklaers by 11 verkeershowe te dek.

“Die stad het voorsorg getref vir 100 kamera-plekke wat hoofsaaklik by kruisings met hoë ongeluksyfers geplaas is,” het hy gesê.

Volg Nuus24 op Twitter  

- Nuus24