Robbeneiland se veerboot dalk gesaboteer
2010-11-18 08:31
Die Burger
Kaapstad - Die moontlikheid van sabotasie op die beleërde Robbeneiland-veerboot word ondersoek.
Dié saak is tans in die hande van die polisie se eenheid teen georganiseerde misdaad.
Dit is Woensdag deur Sibongiseni Mkhize, wat op 1 November as die nuwe uitvoerende hoof van die Robbeneiland-museum (RIM) aangestel is, bevestig.
Mkhize en die topbestuur het ’n voorlegging oor die museum se gekwalifiseerde ouditverslag vir die boekjaar vir 2009-’10 aan die parlementêre portefeuljekomitee oor kuns en kultuur gedoen.
Oor die veerboot het Mkhize gesê die vermoede bestaan dat daar ’n “misdaadelement” doenig is met die bote van die eiland sowel as bote in die Waterfront-gebied.
Volgens hom ondersoek ’n kundige, wat deur die museumraad aangestel is, asook die eenheid teen georganiseerde misdaad tans die probleme rondom die boot.
Die eilandveerboot Sikhululekile het die afgelope paar maande onder talle meganiese probleme gebuk gegaan.
Dit het op 28 September die sesde keer onklaar geraak sedert die boot in Februarie 2008 in diens geneem is.
Die RIM het sedert einde September tot 9 Oktober ten duurste drie ander veerbote gehuur om die toere na die eiland te hervat.
Peter Maluleka, komiteevoorsitter, het gesê die land kan nie bekostig dat die RIM sy Wêrelderfenisstatus verloor nie.
“Ons ervaar jaarliks uitdagings met die Robbeneiland-museum. Ons moet regtig die skip na veilige water stuur. Mense wat baie jare op die eiland deurgebring het, voel baie na daaraan – dit is deel van hul lewe.”
Mkhize het gesê hy kan nie meer besonderhede oor die ondersoek bekend maak nie.
Op ’n vraag op hy sabotasie vermoed, het hy geantwoord: “Dit is waarna die ondersoekspan kyk.” Dit is nie duidelik wanneer die ondersoek afgehandel sal word nie. Die veerbote is tans in diens, maar een word versien.
Volg Nuus24 op Twitter