Richter se vrou skuldig aan sy moord
2010-03-05 16:56
Johannesburg - Die vrou van Franz Richter wat in November 2007 op sy wildreservaat Heia Safari Ranch vermoor is, is skuldig bevind op aanklag van moord.
Regter Piet Meyer het in die Johannesburgse hooggeregshof gesê Celiwe Mbokazi het aktief beplan om hom te vermoor.
Meyer en sy assessore het Donderdag beslis dat die staat bo redelike twyfel bewys het dat Mbokazi nie net skuldig is aan sameswering tot moord nie, maar ook moord en roof.
The Star het Vrydag berig dat die regter gesê het Mbokazi, wat R1 miljoen van Richter sou erf, nie 'n aktiewe deelname in die moord gehad het nie.
Maar Mbokazi het sy veroordeelde moordenaars, Johnson Tshepo Chirwa (35), Dumisani Xulu (39) en Gilbert Mosadi (34) van sy bewegings daardie dag in kennis gestel.
Die hof het bevind dat Mbokazi kort voor Richter se dood talle oproepe van Richter se huisfoon en haar selfoon na Xulu gemaak het.
Die laaste oproep is 20 minute voor die moord gemaak om Xulu in kennis te stel waar sy Richter en hul aangenome kinders was.
Die moordenaars het in die bosse gewag vir sy voertuig om in te kom voor hulle hom doodgeskiet en sy geld gesteel het.
"Celiwe (Mbokazi) het opgetree soos iemand wat 'n bom geplant en gekyk het hoe dit ontplof," het Meyer gesê.
"Daar is nie 'n redelike verduideliking vir die kontak tussen Celiwe (Mbokazi) en Xulu nie. Sy het valslik ontken dat sy Xulu ken. Celiwe (Mbokazi) en Xulu se doel was om Richter te beroof en te vermoor. Die twee het saam opgetree."
Meyer sal na verwagting Vrydag dié weeklange uitspraak afhandel.
– Sapa