Reuse-padversperring op N1 gehou
2011-12-22 07:14
Bloemfontein – Sowat 1000 motors, taxi’s, busse en vragmotors is Dinsdag by ’n reuse-padversperring op die N1-hoofweg buite Bloemfontein voorgekeer en deurgesoek.
Polisie en verkeersbeamptes van oor die provinsie heen het ure lank in die bloedige son elke voertuig behoorlik deurgesoek en is beloon met gemengde suksesse.
’n Man (43) van die Noord-Kaap is met ongeveer 1kg Mandrax-tablette betrap en ’n Mosambiekse burger is in hegtenis geneem nadat skootrekenaars en verskeie selfone, vermoedelik gesteel, by hom gekry is.
Die minister van polisie, Nathi Mthethwa, het die versperring vlugtig besoek.
Nadat hy die Mosambiekse burger agter in die vangwa gegroet het, het Mthethwa se hart klaarblyklik vermurwe toe hy sien hoe die man sweet.
“Wanneer vat julle hom polisiekantoor toe? Hy kry warm, kyk hoe sweet hy. Maak oop die vensters (van die vangwa-kappie),” het Mthethwa vir die provinsiale kommissaris, lt.genl. Khehla Sitole, gesê.
Alhoewel voertuie kilometers ver weerskante van die hoofweg opgehoop het, het die polisie elke voertuig deeglik deurgesoek.
Enjinnommers is nagegaan, tasse moes uit bagasieruime gelaai word, snuffelhonde het tasse en sakke deurgesnuffel en voertuiglisensies en rybewyse is nagegaan. Enkele voertuie en sleepwaens is weens onpadwaardigheid geskut.
Mthethwa het gesê sulke padversperrings is nodig sodat vakansiegangers veiliger kan wees.
“Elke Suid-Afrikaner en mense wat van oorsee hier kuier, het die reg om veilig te voel en te wees. Dis dán wanneer hulle hul vakansie ten volle kan geniet.”
Hy het polisielede en verkeersbeamptes aangemoedig om gefokus te bly. “Dis maklik om nou, wanneer almal gaan vakansie hou en in ’n feestelike luim is, fokus te verloor en bietjie slap te lê. Ons moet, soos gedurende die res van die jaar, paraat en wakker wees,” het Mthethwa gesê.
Volg Nuus24 op Twitter.
- Die Burger