Renosterstropery: Weermag moet help

2012-10-29 11:52

Johannesburg – Die KwaZulu-Natalse natuurbewaringsdienste (Ezemvelo) wil die weermag se hulp inroep om renosterstropery in die provinsie te bekamp, het Beeld berig.

Musa Mntambo, 'n woordvoerder, het erken hulle is onkant betrap toe renosterstropery vanjaar skerp gestyg het.

Teen middel vandeesmaand het stropers 55 renosters in KwaZulu-Natal van kant gemaak teenoor onderskeidelik 34 en 38 in 2011 en 2010.

Naas die Krugerwildtuin se verlies aan 272 renosters word die meeste renosters in KwaZulu-Natal gestroop.

Ná ’n interne ondersoek wat gevolg het op die ontdekking van sewe renosterskarkasse op 22 September in die Hluhluwe-iMfolozi-reservaat, is aanbeveel dat spesialiseenhede van die weermag in die reservaat ontplooi word sodat ’n groter gebied gepatrolleer kan word.

Mntambo het gesê Ezemvelo se teen-stropereenheid het net 60 lede om al die reservate in die provinsie te bewaak en sowat 200 is nodig om aan Ezemvelo se maatstaf van een lid per 1 000 ha te voldoen.

’n Gewone veldwagter en ’n lid van die teen-stropereenheid is ná dié ondersoek geskors.

Volg Nuus24 op Twitter  

- SAPA