Rektor sê SA is in groot moeilikheid
2012-03-02 07:00
Pretoria – Suid-Afrika is in baie ernstige moeilikheid.
Hy het die land voor én na 1994 beleef en nooit gedink swart mense sal “Kill the Boer” sing of sê dat hulle grond wil vat nie, het prof. Jonathan Jansen, rektor van die Universiteit van die Vrystaat (UV), gister gesê.
Hy het die media in Johannesburg toegespreek oor hoe dit vandag met die universiteit gesteld is ná die omstrede Reitz-voorval.
Jansen het gesê ’n onlangse opname oor die klimaat op die kampus het getoon studente is gelukkig en tevrede en dat hulle akkoord gaan met die veranderingstrategie waarmee die UV begin het.
Hy het gesê sy uitgangspunt is om die huidige gemors in die land te probeer vergeet en te fokus op die leiers van môre. Dit is hoekom die UV ’n strategie het om ’n nuwe institusionele kultuur te vestig en studente met ’n ander visie vir die toekoms voor te berei.
Hy het gesê die UV is met ’n mense- en akademiese projek besig.
’n Verpligte vak (UFS101) vir alle eerstejaars is ingestel wat ten doel het om kritiese denke te bevorder en waar studente antwoorde op ernstige vrae moet soek soos hoe die geskiedenis hulle beïnvloed, wat regverdigheid werklik beteken, of daar lewe elders is, wat God regtig gesê het en hoe finansiële krisisse die wêreld kan laat tuimel.
Volgens Jansen is die vak daarop gemik om studente nie net ’n graad te gee nie, maar ook ’n opvoeding.
Wat die akademiese projek betref, het hy gesê die UV het vanjaar net 4 500 eerstejaars uit 13 000 aansoeke aanvaar om seker te maak dat hulle sukses kan behaal en nie die mislukkings van die skoolstelsel oordra nie.
Volgens Jansen het die UV verlede jaar ook sy toelatingsvereistes verhoog wat deurvloeisyfers verbeter het. “Dit is onregverdig om studente in te neem wat so swak is en nie hul eie name kan skryf nie.”
Jansen het gesê die primêre krisis in skole is nie hulpbronne of die kinders nie. “Dit gaan oor kernwaardes wat ontbreek en vakbonde wat skole oorneem en die onderwysminister uit die Oos-Kaap jaag.”
– Volg Nuus24 op Twitter
- Beeld
