Rekrute te lig in die broek vir rugsakke
2011-02-04 09:00
Johannesburg – Geweeg en te lig bevind.
Dít was die dilemma wat verskeie weermagrekrute die afgelope twee weke beleef het toe hulle tydens hul basiese opleiding huis toe gestuur is.
Die SA Militêre Gesondheidsdiens (SAMGD) probeer ’n uitweg vir van die rekrute vind en sommige is intussen toegelaat om weer met opleiding voort te gaan, het die weermag gesê.
Van die vrouerekrute is tydens ’n mediese ondersoek ná ’n week van opleiding geweeg. Van hulle het net sowat 46 kg geweeg.
Die weermag neem in ag dat hulle tydens hul veldopleiding swaar rugsakke moet dra.
Waar die gemiddelde gewig van die rugsakke meer as 20% van die rekrute se gewig oorskry, word aanvaar hulle sal dit nie kan regkry sonder om permanente beserings op te doen nie.
Verskeie rekrute het ook die afgelope week voedselvergiftiging opgedoen.
Daar was klagtes dat daar nie betyds mediese ordonnanse by die SAMGD se opleidingsentrum in Lephalale (Ellisras) was om hulle te help nie. Hul makkers moes hulle in kruiwaens na die kliniek stoot omdat hulle te siek en swak was om self te loop.
’n Span inspekteurs het ondersoek na die oorsaak vir die vergiftiging ingestel. Vermoedelik was daar ’n besmettingsfaktor onder ’n bepaalde groep rekrute omdat net dié groep in dieselfde kamer siek geword het.
Van die rekrute het ook gekla omdat hulle oor naweke in die tuin moet werk, maar volgens kol. Louis Kirstein, woordvoerder van die SAMGD, word dit as instandhouding van die basis beskou.
Volg Nuus24 op Twitter
- Beeld