Rekordprys vir SA diamant betaal
2010-02-27 07:28
Johannesburg - Die hoogste prys wat tot nog toe vir ’n ongeslypte diamant aangeteken is, is gister betaal toe Petra Diamonds ’n 507 kar.-vonds vir $35,3 miljoen (sowat R270 miljoen) aan ’n Hongkongse juweliersfirma verkoop het.
Die diamant, bekend as die Cullinan Heritage, word as een van die mees gesogte ongeslypte siersteendiamante bestempel omdat hy basies geen fout het nie. Foute soos klowe en onsuiwerhede in ’n diamant verlaag die waarde en kom dikwels voor in diamante wat suiwer voorkom.
’n Diamant word gewoonlik beoordeel op grond van sy slypmoontlikhede, grootte, deursigtigheid en kleur. Vir al dié maatstawwe het die Cullinan Heritage die hoogste beoordeling gekry.
Johan Dippenaar, uitvoerende hoof van Petra, het gesê dit is heel gepas dat dié diamant die rekords oortref. “Dit het die potensiaal om een van die wêreld se mees gesogte geslypte diamante te word.”
Die prys beteken dat die diamant sowat $70 000 per karaat kos, ’n verstommende prys as in ag geneem word dat siersteendiamante gemiddelde pryse van tussen $200 en $400 per karaat behaal. ’n Uitsonderlike diamant sal meer kos, maar die $70 000 per karaat is ongekend.
Die diamant se waarde is aanvanklik op $25 miljoen beraam, maar die Chow Tai Fook-juwelierswaregroep in Hongkong was bereid om heelwat meer op te dok. Chow Tai Fook is die vernaamste diamanthandelaar in die Ooste.
Die Cullinan Heritage is in September verlede jaar in die Cullinan-myn ontdek. Dit is die vierde grootste diamant wat in die myn gevind is, naas die Cullinan (3 108 kar.), die Golden Jubilee (755 kar.) en die Centenary (599 kar.).
Die Cullinan van 3 108 kar. is die grootste ongeslypte diamant wat nog ooit ontdek is. Geen realistiese verkoopswaarde kon in 1905 daarvoor vasgestel word nie en dit is daarom aan die Britse koningshuis geskenk.
Groot dele van die diamant pryk in die Britse kroonjuwele.
Petra het die Cullinan-myn vroeër van De Beers gekoop.
- Beeld